TOPONIMI LEMBUR KURING DESA CILUMBA
Harita,
kaayaan kelas ngadadak ramé. Éta dibalukarkeun aya salasaurang babaturan kuring
nu nyebutkeun yén di daérahna aya kampung nu ngaranna Sarkanjut. Kuring jeung
nu séjénna riweuh pada hayang apal naha bet éta kampung téh bisa dingaranan
Sarkanjut. Sangeus kitu, kuring sadar yén tangtu éta ngaran téh moal sagawayah
dibikeun, tapi aya ajén inajén anu nyamuni nu bisa kaguar lamun ditalungtik
leuwih nyosok jero deui.
Dina
ieu tulisan, kuring moal ngaguar ngeunaan kampung Sarkanjut, tapi rék
ngadadarkeun toponimi atawa prosés méré ngaran patempatan nu aya di lembur
kuring di wewengkon desa Cilumba, kecamatan Cikatomas. Kajadian di luhur geus
nyadarkeun kurig yén tempat cicing téh lain wungkul ngan saukur tempat miceun kokotor
urang, tapi dijerona aya ajén filosofis nu kudu ku urang dipikanyaho. Lamun
urang teu apal kana harti ngaran tempat cicing urang, rék kumaha urang bisa ngajaga
ngariksa lembur urang ?. Mudah-mudahan ieu tulisan bisa
méré mangfaat ka urang saréréa nu cicing di wewengkon desa Cilumba, sarta bisa
ngajaga kabuayaan nu geus diwariskeun ku para karuhun urang.
Toponimi kampung di wewengkon
desa Cilumba, ditilik tina harti leksikalna.
Desa Cilumba mangrupa hiji desa
nu aya di sahandapeun kapamaréntahan kecamatan Cikatomas, kabupatén
Tasikmalaya. Ieu desa miboga tujuh kampung, nya éta:
- Kampung Sampalan Jamé (Jambé).
- Kampung Pasir Jati
- Kampung Muyul (Munjul)
- Kampung Jati Wangi
- Kampung Sukarasa
- Kampug Cimahpar
- Kampung Cipancur
·
Cikatomas
Cikatomas mangrupa kecap majemuk tina kecap
cai jeung katomas. Ci
hartina cai, sedengkeun katomas nya éta tangkal nu sok disebut ogé puring, sajenis imba; nya éta tatangkalan nu sok dipelak
gigireun pager miboga fungsi keur mapaés. Daunna bisa didahar digalokeun jeung
daun mamangkokan. Lamun dipatalikeun, sigana baheula réa tangkal katomas sarta
disabudeureun tangkalna réa cai.
·
Cilumba
Sarua jeung cikatomas, Cilumba
ogé asal kecapna tina cai jeung lumba. Lumba mangrupa kecap tina basa
kawi nu hartina luncat atawa macur. Sigana baheulana aya cai nu mancur di ieu
tempat.
·
Sampalan Jamé
Di wewengkon
kecamatan Cikatomas,
masarakatna teu ilahar nyebut konsonan nu ngaréndéng di sakalikeun (asimilasi).
Saperti kecap jambé, masarakat Cikatomas biasana nyebut jamé. Sampalan Jamé asalna tina kecap sampalan jeung jambé. Sampalan miboga
harti tanah lega nu pinuh ku jukut sarta tara dipiara. Sok disebut ogé tegal.
Biasana paranti nganggon sasatoan. Sedengkeun kecap jambé nya éta tangkal nu catangna lempeng tur tara aya dahanan.
Buahna sagedé kadongdong sarta raranggeuyan. Baheulana sigana ieu tempat
mangrupa tempat panganggonan munding jste.
- Bihbul
Bihbul mangrupa ngaran kai nu sok disebut ogé Mabolo atawa Samolo. Ieu
kai biasana sok jaradi di jojontor wahangan. Teuing kumaha asal muasalna bet
ieu kampung dingaranan Bihbul, da lamun nilik kana geografisna mah ieu kampung téh justru aya di papasir.
- Munjul
Munjul asalna tina kecap muncul,
atawa pecenghul kusabab titeuleum.
Ningali geografisna, ieu kampung téh ayana di léngkob. Bisa waé disebut Munjul
téh alatan aya di léngkob nu siga pakpecenghul.
- Jati
Kecap jati
miboga harti asal, tulén. Saperti
dina kekecapan mulang ka jati mulih ka
asal. Aya ogé nu méré harti kasaktian,
saperti dina kekecapan ngadu jajatén.
Jajatén sorangan mangrupa kecap nu
asalna tina jajatian, terus ngalaman
Shandi nya éta patepungna foném i jeung a, jadi wé jajatén. Harti
séjénna nya éta ngaran kai panghadéna
keur dipaké nyieun parabot. Can kapaluruh mana harti kecap jati nu dipaké dina
prosés méré ngaran éta kampung.
- Jati Wangi
Jati Wangi asal
kecapna tina jati jeung wangi atawa seungit. Sigana, baheula di deukeut tangkal Jati sok kaambeu aya nu
seungit ngadalingding, atawa kasaktian masarakat ieu kampong geus ngadalingding atawa kasohor seungitna.
- Sukarasa
Sukarasa mangrupa
kecap majemuk nu asal
kecapna tina suka jeung rasa. Suka asalna tina bahasa Sansekerta nu hartina
sarua jeung bungah. Sedengkeun rasa
nya éta hal nu patali jeung ngeunah atawa henteuna hiji hal. Ieu kampung dibéré
ngaran Sukarasa sabab mangrupa du’a sangkan masarakatna tetep barungah
rarasaan.
- Cimahpar: Can kapaluruh
- Cipancur
Cipancur mangrupa kecap
majemuk tina kecap ci jeung pancur. Pancur nya éta turunna jeung sumebyarna cahaya saperti nu ngucur.
Bisa ogé dilarapkeun kana cai. Kaharti mun seug dingaranan Cipancur, sabab
geografisna cur-cor cai sabab aya di léléngkob.
Mudah-mudahan
kahareupna ieu tulisan tiasa di lengkepan deui, sarta bisa maluruh ngaran
kampung tina aspék-aspék séjénna. Kukituna, sim kuring nyuhunkeun pangdeudeul
kasadayana.
Referensi:
Danadibrata. R.A. 2006. Kamus Basa Sunda. Bandung: PT Kiblat
Buku Utama.
Komentar
Posting Komentar